BAGUIO CITY – Nakumpiskar dagiti otoridad sadiay Pozorrubio, Pangasinan ti dumanon 40 a sibibiag a baboy a naituding a maiturong ditoy Baguio City ken Benguet iti panag-checkpoint nga insayangkat dagitoy.
Sigun kenni PMajor Rommel Bagsic, hepe ti Pozorrubio PNP, insayangkatda ti panag-checkpoint kas panagtungpalda iti pammilin ti gobernador ti Pangasinan a temporaryo panakaipawil ti panakaibiahe dagiti baboy ken produkto manipud iti baboy iti masakupan ti probinsia.
Intunda daytoy ti saan paylaeng a maipalawag a panakatay dagiti adu a taraken a baboy iti tallo a barangay sadiay Rodriguez, Rizal.
Immuna a nasitar dagiti pulis ti lugan a nakaikabilan dagiti 16 a baboy ken simmaruno a nasitarda ti lugan a nakaikabilan ti kanayonan a 23 a baboy.
Naamuan a ti immuna a nakailuganan dagiti baboy ket naituding nga agturong iti Baguio City bayat a ti maikadua a nakailuganan dagiti baboy ket naituding nga agturong iti Benguet ken awanan dagitoy iti kaskenan a dokumento.
Iti agdama, naipaima iti maseknan nga ahensia dagiti nakumpiskar a baboy para iti panakai-quarrantine dagitoy.
