BAGUIO CITY – Mangrugin ti biag iti kinakadete ti 400 nga agtutubo a balligi a nakapasa iti eksaminasyon ti Philippine Military Academy (PMA) iti maangay a Reception Rites para kadagitoy iti Borromeo Field ita nga aldaw, June 1.
Iti panakiyuman ti Bombo Radyo kenni Lt. Col. Rey Balido, panakangiwat ti PMA, kinunana a dagiti napili a 335 a lallaki ken 65 a babbae ti mangbukel iti PMA Class 2022.
Kinunana a ti Reception Rites ti seremonya a pang-awatan ti PMA kadagiti baro nga agbalin a plebo sadiay.
Idauluan dagiti upperclass cadets a mangbukbukel iti Plebe Detail ti nasao a seremonya ken dagtoy ti mangipaay iti serye ti exercises nga aramiden dagiti plebo kas iti push-up, sit-up, squat thrust, jumping jacks ken dadduma pay kas paun-una a kapadasan iti mapasaranda iti “Beast Barracks.”
Sigun kenkuana, kalpasan ti Reception Rites ket maipasidong iti dua a bulan a Beast Barracks dagiti plebo ken kalpasanna ket mapagbalinen dagitoy a regular a miembro ti Cadet Corps of the Armed Forces of the Philippines.
Innayonna a ti Reception Day ti mangmarka iti umuna nga aldaw ti military career ken maudi nga aldaw ti sibilyan a biag dagiti nasao nga agtutubo.
Dinakamatna pay nga idi kuma April 1 ti nasao a seremonya ngem inyakarda iti June 1 tapnu maipada ti academic year ti PMA kadagiti civilian universities a ti panagrugi ti klase ket inton August.
Kabayatanna, dinakamat ni Balido a mairikep manipud kadagiti turista ti PMA iti agsapa inton bigat.
Kinunana a daytoy ket tapnu maipaayan iti prayoridad dagiti nagannak dagiti sumrek a kadete iti akademya.
Innayonna nga apaman a malpas ti aktibidad ket mailukat iti publiko ti PMA.
