BAGUIO CITY – Nakwalipikar ti entries dagiti 43 nga indibidual para iti 2018 Search for Edible and Backyard Farm a maysa kadagiti flagship programs ti Urban Farmers Month ita a bulan ti Mayo a maramrambakan ditoy siudad ti Baguio.
Sigun kenni Councilor Leandro Yangot Jr., chairman ti Committee on Market, Trade, Commerce and Agriculture ti City Council, nangatnagto ti nasao a bilang no iti 30 nga entries idi napalabas a tawen.
Kinunana a daytoy ti mangipakpakita nga immado dagiti tattao a naka-amiris iti kinapateg ti panaka-adda ti bukod a backyard farms iti baet a limitado ti espasyo iti masakupan ti pagtaengan dagitoy tapnu adda ti kanayonan a pagtaudan dagiti nateng wenno masida.
Innayonna a daytoy pay ti mangipakpakita a sibibiag latta ti organic farming uray iti highly urbanized city a kas iti siudad ti Baguio.
Guyguyuguyenna met dagiti umili iti siudad nga agaramidda iti bukodda a backyard farms para iti produksion ti bukodda a suplay ti organiko a nateng.
Naituding a makaawat iti P18,000 ti makagun-od iti umuna a pwesto bayat a P13,000 iti maikadua a pwesto; P9,000 iti maikatlo a pwesto; P6,000 iti maikapat a pwesto; P4,000 ti maikalima a pwesto ken sag-P2,500 iti walo a mapili para iti consolation prize.
