Dumanon iti 45 nga indibidual ken dua a Top 15 contracting firms iti pagilian ti napilaan iti kaso, maysa a tawen kalpasan nga imbutaktak ni President Ferdinand “Bongbong” Marcos Jr. ti multibillion peso flood control corruption controversy.
Naipila dagiti kaso iti innem a batch kontra iti 45 nga indibidual no sadino, maysa ditoy ti kangrunaan nga opisial ti Department of Public Works and Highways (DPWH) nga asidegen nga agbalin nga state witness.
Daytoy ti kaudian a datos kalpasan ti State of Nation Address (SONA) ti Presidente idi 2025, agingga iti kaudian a SONA-na idi Lunes, July 27, 2026.
Naipila ti umuna a kaso iti Sandiganbayan idi Nobiembre 18, 2025 kontra kenni sigud a House Appropriations Committee Chairman Zaldy Co nga agtaltalinaed nga at large; DPWH Mimaropa Regional Director Gerald Pacanan; opisial ti Sunwest Corp., ken sumagmamano nga opisial ti DPWH Mimaropa.
Dagiti dadduma pay a naidarum ket pakairamanan ni sigud a senador Bong Revilla, Senador Jinggoy Estrada, ken USWAG Ilonggo Partylist Representative James “Jojo” Ang Jr.
Malaksid iti dayta, dua a kontraktor manipud iti Top 15 a listaan dagiti contracting firms ti sumangsango iti kaso, partikular ti St. Timothy Construction ken Sunwest Corporation.
Ti St. Timothy ket kukua dagiti agassawa a da Pacifico ken Sarah Discaya.
Kabayatanna, agserserbi nga state witness ti kontraktor a ni Sally Santos, agraman dagiti nangato ti ranggona nga opisial ti DPWH a pakairamanan da sigud nga Undersecretary ti DPWH Roberto Bernardo, sigud a Bulacan First District Engineering Office District Engr. Henry Alcantara, ken sigud a Regional Director ti DPWH a ni Gerard Opulencia.
