BAGUIO CITY – Naipaima iti National Meat Inspection Services ti sinako-sako a napulpogan nga aso a nakumpiskar manipud iti maysa a pick-up iti checkpoint nga impatungpal ti pulisya sadiay Longlong, La Trinidad, Benguet idi rabii.
Sigun iti La Trinidad PNP, kabayatan ti panangsukimatda iti nasao a lugan nga addaan iti plaka a WCR-994 ket adda ti naangotda a naidumduma manipud kadagiti sako a karga ti lugan.
Gapu iti daytoy, linuktanda dagiti sako nga adda iti uneg ken ditoy a nakitada dagiti napulpogan nga aso.
Kinemmeg dagiti pulis ti driver ti lugan a ni Elvis Salagan Darisan, 30-anyos, tubo ti Apayao ken residente ti Cavite ken ti kaduana a ni Ray Medina Malecdan, 44-anyos, tubo ti Sagada, Mt. Province ken residente ti Baguio City.
Maibasar iti report, kinuna dagiti suspek a nagtaud sadiay Pangasinan dagiti karne ti aso ken maideliber koma dagitoy sadiay La Trinidad, Benguet.
Sumangsango dagiti suspek iti kaso a panaglabsing iti Animal Welfare Act, Anti-Rabies Act ken Meat Inspection Code of the Philippines
