BAGUIO CITY – Nakemmeg ti uppat a drug personalities iti nagsisina a buy-bust operation ken maysa a drug personality a naaktuwan a nagilako ti iligal a droga iti nagduduma a paset ti rehion Cordillera idi kalman.
Nakemmeg iti operasyon sadiay Alno, La Trinidad, Benguet ni Samuel Anatado, 42-anyos, naasawaan, tubo ken residente ti Dontogan, Green Valley, Baguo City.
Nakumpiskar kenkuana ti maysa a pekete ti maatap a shabu nga agdagsen ti 1.16 grams.
Kabayatanna, naipisok manen iti pagbaludan ni Mark Dick Trondillo, 38-anyos kalpasan a nakemmeg iti operasyon sadiay Dolores, Abra.
Nakumpiskar kenkuana ti tallo a pakete ti maatap a shabu.
Kinuna ti pulisya a ni Trondillo ket maibilbilang a maika-10 a high value target iti Abra gapu iti iligal a droga ken maika-7 a high value target iti listaan ti PDEA iti regional level.
Immuna metten a nakemmeg daytoy idi August 27 kalpasan a nagpositibo ti naiserbi a search warrant kontra kenkuana ngem nakapiansa idi September 7.
Kabayatanna, nakemmeg metlaeng iti nagsina nga operasyon sadiay Tabuk City, Kalinga ti dua a high value individuals a nabigbig a da Japy Wasigan, 25-anyos ken Larry Antimano Pascual, 52-anyos.
Nakumpiskar kadakuada ti saggaysa a pakete ti maatap a shabu nga agdagsen ti agarup nasurok 0.83 gram.
Naipaima pay iti pulisya ti newly identified drug personality a ni Marvin Andaya Domingo, 22-anyos kalpasan a tiniliw daytoy dagiti barangay officials ti Nambaran, Tabuk City, Kalinga gapu iti panagilakona ti iligal a droga.
Nakumpiskar kenkuana ti maysa a pakete ti maatap a shabu, maysa a pakete a naglaon ti residue, tallo a naaramaten nga aluminum foil.
Sumangsango metten dagiti lima nga indibidual iti kaso a panaglabsing iti RA 9165 wenno ti Comprehensive Dangerous Drugs Act of 2002.
