BAGUIO CITY – ‘Dead on the spot’ ti lima a lallaki a maatap a hijackers iti panakipinnaltogda kadagiti personnel ti Regional Highway Patrol Group (RHPG)-Cordillera ken Tuba Municipal Police Station (MPS) sadiay Taloy Sur, Marcos Highway, Tuba, Benguet idi parbangon, June 30, 2021.
Sigun kenni PCapt. Marnie Abellanida, panakangiwat ti Police Regional Office Cordillera, nangisayangkat iti hot pursuit operation dagiti operatiba kalpasan a naawatda ti flash alarm seknan iti maatap a hijacking a napasamak sadiay La Trinidad, Benguet, no sadino, inreport ti maseknan a driver ti panaka-hijack ti subject vehicle a maysa a wing van truck nga addaan ti plaka nga ADH 3116.
Naglibas dagiti suspek paturong iti Marcos Highway babaen iti na-hijack a truck ken maysa pay a gray SUV nga awanan ti plate number.
Kinunana nga immuna a nagpaputok dagiti suspek isut gapuna a nagbales dagiti pulis agingga a naaddaan dagitoy iti engkwentro ken nagresulta iti panakapapatay dagiti suspek.
Awan met ti nadangran iti benneg dagiti pulis.
Kinuna ni Capt. Abellanida a nainget a maimbestigaran ti insidente nangruna ta dua kadagiti napapatay a suspek ket naka-unirporme ti pulis ken naala kadagitoy ti PNP IDs bayat a maysa pay ti naalaan ti NBI ID.
Nupay kasta, patienna a nagpammarang laeng a pulis dagiti dua kadagiti suspek tapnu makalsotda laeng kadagiti border checkpoints.
Nasarakan iti abay dagiti bangkay ti lima a paltog no sadino, uppat ti pistol ken maysa a long firearm.
Iti agdama, naiturong dagiti bangkay iti maysa a punerarya ditoy Baguio City para iti umno a panakaiproseso dagitoy.
