BAGUIO CITY – Nakemmeg ti agkasinsin a baro a drug personalities iti siudad ti Baguio iti drug buy-bust operation nga impatungpal ti Drug Enforcement Unit ti Baguio City Police Office sadiay Kayang-Hilltop Barangay idi kalman.
Nabigbig dagitoy a da Rodante Zarate Mabalot, 37-anyos ken Leonardo Mabalot, 38-anyos, agpada nga autoshop owners ditoy siudad, tubo ti Tubao, La Union ken residente iti Barangay Gibraltar, Baguio City.
Nakumpismar manipud kadagiti dua a suspek ti tallo a sachets a naglaon ti mapapati a shabu, maysa a genuine P1,000 bill, uppat a P1,000 boodle money ken ti cellphone a naaramat iti transaksion.
Kabayatanna, nakemmeg ti tallo nga indibidwal iti anti-drug operation nga impatungpal ti La Trinidad Municipal Police Station sadiay Barangay Pico idi kalman.
Naamuan a dua kadagitoy ket drug user bayat a ti maysa drug pusher a sigud a barangay tanod ti nasao a barangay malaksid pay a drug surrenderer metlaeng daytoy ti La Trinidad MPS.
Kiniddaw met dagiti suspek a saan a mabigbig ti naganda para iti pagimbagan dagiti annak dagitoy.
Naala kadakuada ti 22 a plastic sachet a naglaon iti mapapati a shabu, uppat a residue ti mapapati a shabu, P600 a kuarta ken dadduma pay a drug paraphernalia.
Sumangsango dagiti nasao a suspek iti kaso a panaglabsing iti Comprehensive Dangerous Drugs Act of 2002.