BAGUIO CITY – Nadangran ti uppat nga indibidual kalpasan a nagdidinnungpar ti lima a lugan sadiay Caucalan, Taloy Sur, Tuba, Benguet idi rabii.
Sigun kenni PCI James Acod, hepe ti Tuba PNP, dagiti nairaman iti insidente ket maysa a 10-wheeler wing van truck a naglaon ti nagduduma a nateng nga inmaneho ni Delio Dagdag, 34-anyos, residente ti Puguis, LTB; maysa a hilux pick-up nga inmaneho ni Vico Gonzales, 22-anyos, residente ti Itogon, Benguet; maysa a tipper truck a tagikua ti Goldrich Construction nga inmaneho ni Arsenio Buslayan, 64-anyos, residente ti Tuba, Benguet; maysa a camper pick-up nga inmaneho ni Jansen Ofo-ob, 31-anyos, residente ti Pacdal, Baguio City ken maysa a dump truck nga inmaneho ni Reagan Singdanan, 46-anyos, residente ti Pines Park, LTB.
Kinunana a paturong sadiay lowland ti 10-wheeler wing van truck ken kalpasan a limmabas daytoy iti kurba a paset ti kalsada ket maatap a napukaw ti preno daytoy a nagresulta iti panakaidungparna iti camper pick-up a nakaparada idi igid ti kalsada.
Nagtultuloy ti nasao a 10-wheeler wing van truck agingga a nadungparna ti nakaparada a hilux pick-up.
Naiduron ti hilux pick-up paatras agingga a naidungpar iti nakaparada a tipper truck nga adda iti linya ti pa-Baguio a kalsada sakbay a naidungpar iti maysa a poste ti kuryente agingga a nagsardeng iti sangwanan ti maysa a pagtaengan sadiay.
Nadangran iti insidente dagiti pasahero ti hilux pick-up a da Jaryl Tinong So-oc, 14-anyos ken Shawn Briggs Romillo Pisec, 16-anyos nga agpada a residente ti Tuding, Itogon; ken ti dua a pasahero ti 10-wheeler truck a da Anthony Mabitasan, 22-anyos ken Johnson Gaspar, 6-anyos.
Naiturong dagiti nadangran iti pagagasan bayat a nakaro a nadadael ti sango ken passenger side ti hilux pick-up, nakaro a nadadael ti sango ti 10-wheeler wing van truck ken saan met a nakaro ti dadael a nasagrap dagiti tallo a dadduma a lugan a nairaman iti insidente.
Sumangsango met ti driver ti van truck a ni Dagdag iti kaso a reckless imprudence resulting to damage to property and multiple physical injuries.
