BAGUIO CITY – Nakasaganan ti lima nga Igorot mixed martial artists (MMA) fighters manipud iti Team Lakay para iti umadani a labanda iti ONE: Global Superheroes inton Enero 26 sadiay Mall of Asia Arena.
Sigun kenni Geje ‘Gravity’ Eustaquio, kasapulan laeng nga isaganada ita ti panunutda ken adalenda ti isayangkatda a game plan kontra kadagiti makalabanda.
Kinunana a nainget ti panagsagana dagiti kakaduana tapno maipakita dagiti kabaelan dagiti Cordillerans iti tay-ak ti MMA.
Impannakkelna met ti dakkel a tulong para kadakuada ti suporta nga ipakapakita dagiti kakailyan tunggal adda ti laban dagitoy.
Maipalagip nga inton Biyernes ti naituding a rematch-da Eustaquio ken Kairat Akhmetov kalpasan ti kontrobersial a panangabak ni Akhmetov iti titulo nga interim ONE Flyweight World Championship idi September 2016.
Agserbi met a co-main event ti laban da ONE strawweight title contender Joshua Pacio ken Lan Ming Qiang ti China iti strawweight division.
Daytoy metlaeng ti kaunaan a gundaway a nairaman iti maysa a fight card ti agkabsat a da Eric ken Edward Kelly malaksid pay a nainayon iti nasao nga event ni April Osenio, dua a lawas sakbay ti laban ken makasangona ti Pinay a ni Jomary Torres.
[photo credit to ONE Championship]
