[photo credit to the owner]
BAGUIO CITY – Sumangsango iti kaso a panaglabsing iti Philippine Mining Act of 1995 ti lima nga indibidual kalpasan a nakemmeg dagitoy gapu iti iligal a panangideliberda iti mineral ore wenno naba.
Sigun iti Bugiuas PNP, naharang dagitoy ti uppat a truck sadiay Halsema Highway, Bekes, Buyacaoan, Buguias, Benguet kabayatan ti panangipatungpal dagitoy iti checkpoint.
Nabigbig dagiti suspek a da Joey Ligunan, 35, driver ti puraw a forward truck nga addaan iti plaka nga RHE 592 ken ti helper daytoy a da Paul Ana-as, 28 anyos, agpada dagitoy a rsidente ti Bangaan, Sagada, Mt. Province.,
Nakemmeg pay ni Marvin Domaneo, 28, residente ti Besao, Mt. Province, driver ti maysa pay a forward truck nga awanan iti plaka; ni William Dongail, 47, residente ti Bangaan, Sagada, Mt. Province, driver ti forward truck nga addaan iti plaka nga WBX 292; ken ni Henry Curiman Halili, 37, a residente ti Wangal, La Trinidad, Benguet ken driver ti ten wheeler truck nga addaan iti plaka nga RHU 939.
Maibasar iti report, amin dagiti nasao nga indibidual ket nagtaud manipod sadiay Sagada, Mt. Province ken dumanon iti 490 a sako a tailings ti mineral ore ti nakumpiskar manipod kadagitoy.
Sumangsango dagitoy iti kaso a panaglabsing iti Republic Act 7942 wenno Philippine Mining Act of 1995.
