BAGUIO CITY – Naawat ti Baguio City Health Services Office ti 5,100 a doses ti Gamaleya Sputnik V vaccine.
Nagtaud dagiti bakuna iti Central Office ti Department of Health ken sinukimat ti Food and Drugs Administration – Cordillera.
Timmulong met ti Special Weapons and Tactics wenno SWAT Team ti Baguio City Police Office iti panakaibiahe dagiti nasao a bakuna.
Kagiddan iti daytoy, iyap-apela ti Baguio City Health Services Office ti panagparehistro iti bakuna.baguio.gov.ph dagiti indibidual a karaman iti A1 Category wenno dagiti health workers, iti A2 Category wenno dagiti senior citizens ken iti A3 Category wenno dagiti persons with co-morbidities a saan pay a nakapagrehistro iti COVID-19 vaccination program.
Maipalagip nga inwaragawag ti DILG a ti Baguio City ti numero uno a lokal a gobyerno iti ruar ti Metro Manila nga addaan ti kangatuan a bilang dagiti indibidual a nabakunaan kontra iti COVID-19.
