BAGUIO CITY – Dumanon iti 55% kadagiti pasyente ti COVID-19 sadiay La Trinidad, Benguet ti naka-home quarantine ita gapu iti kinakurang ti isolation facility a pakaiturongan wenno pagyanan dagitoy.
Iti interview ti Bombo Radyo Baguio, imbinglay ni Mayor Romeo Salda a manipud iti 324 nga aktibo a kasoda iti COVID-19 ket 55% wenno nasurok 170 kadagitoy ti naka-isolate iti bukodda a pagtaengan.
Kinunana a dagiti contact tracers, ti municipal health officer ken dagiti Barangay Health Emergency Response Teams ti umuna a mangdesisyon no mabalin nga ag-home quarantine ti maysa a COVID-19 patient babaen iti pananginspeksion dagitoy iti pagtaengan ti pasyente.
Dinakamatna a no makedngan ti home quarantine ti maseknan a pasyente ket responsibilidad metlaeng dagitoy nga iwanawan ti nasao a pasyente tapnu masigurado nga awan ti mapasamak a panaginnakar iti uneg ti pagtaengan daytoy.
Sigun pay kenkuana, kaaduan kadagiti naka-home quarantine ita sadiay La Trinidad ket dagiti awanan ti sintomas ken dagiti makarikrikna iti saan unay a nakaro a sintomas ti COVID-19.
Naamuan nga ita ket uppat ti isolation facilities ti La Trinidad ngem napunnon dagitoy gapu iti agtultuloy a panakailista ti kaso ti COVID-19 sadiay.
Iti baet daytoy, impannakkel ni Mayor Salda nga adda ti baro a pasdek nga abanganda a mapagbalin nga isolation facility nga aglaon iti 20 a kama para kadagiti nakaptan ti COVID a makarikrikna iti nakaro a sintomas.
