BAGUIO CITY – Inladawan ti maysa nga Overseas Filipino Worker (OFW) a kabutbuteng ti 6.1 magnitude a ginginned a napasamak sadiay Japan idi kalman ti agsapa.
Iti panakiyuman ti Bombo Radyo kenni Denver Vicente, manipud Tuba, Benguet nga agtatrabaho ita iti maysa a paktoria sadiay Nagoya, Japan, kinunana nga impagarupna nga “end of the world” wenno panungpalanen idi nangrugi a nagdayyeg ti pasdek nga ayanda idi kalman.
Kinunana a nariknada ti napigsa a gingined kabayatan ti meeting iti kompanya dagitoy sakbay ti trabahoda.
Inyestoryana a nag-panic daytoy nangruna ta umuna a gundaway a nakarikna iti gingined a nagresulta iti arigna panagsala ti ayanna a pasdek.
Nupay kasta, kinunana a saan daytoy a nagpadlaw gaputa kalmado laeng dagiti kakadwada a Hapon.
Kinunana a nagbalin met laeng daytoy a kalmado nangruna ta ammona a natitibker dagiti pasdek sadiay Japan gaputa daytoy ti maysa a tuttutukan ti gobyerno ti nasao a pagilian.
Naamuan a walo a bulanen nga agtatrabaho sadiay Japan ni Vicente.
Kabayatanna, agyamyaman met dagiti OFWs sadiay Japan gaputa natalged ti kasasaad dagitoy kalpasan ti nasao a gingined.
Iti met panakiyuman ti Bombo Radyo kenni Melchor Gumpeng manipud La Trinidad, Benguet ken agtatrabaho iti maysa a carpentry company sadiay Saitama, Japan, kinunana nga awan ti kakadwana a Pinoy a nadangran iti nasao a kalamidad.
Sigun kenkuana, saan unay a napigsa ti nariknada a panagdayyeg sadiay Saitama gaputa sadiay Osaka a timmana ti sentro ti gingined.
Nupay kasta, kinunana nga agridamda latta nangruna ta masansan a mapaspasaran ti gingined sadiay Japan.
