BAGUIO CITY -Dumanon iti 6.5 a tonelada ti farm hazardous wastes manipud iti nagduduma a munisipyo ti Benguet ti naituding a maibiahe paturong iti designated waste treater sadiay Tarlac.
Kasaruno daytoy ti naan-anay a panakairehistro ti Benguet LGU kas farm hazardous waste generator kalpasan ti dua a tawen a panakaiproseso dagiti dokumento ti probinsia.
Sigun kenni Rowena Billig, Provincial Officer ti Fertilizer and Pesticide Authority – Baguio-Benguet, babaen iti panakairehistro ti Benguet LGU kas farm hazardous waste generator ket agbalinen a naannayas ti panakaimaton dagiti hazardous wastes a mapapataud ti probinsia.
Naamuan a naisardeng ti panaka-akop dagiti hazardous wastes ti probinsia gapu iti nainget a waste management guidelines ti DENR, no sadino, karaman ditoy ti pagalagadan a nasken a registered waste generator ti pagtaudan dagiti maibiahe a hazardous wastes.
Manamnama pay a babaen iti panakairehistro ti Benguet LGU kas farm hazardous waste generator ket mangrugi metten ti natibker a partnership iti implementasyon ti sustainable farm hazardous waste management iti probinsia.
Karaman kadagiti hazardous wastes a mapapataud ti probinsia dagiti botelya wenno nagyanan dagiti pestisidio a naaramat kadagiti pagmulaan dagiti mannalon iti Benguet.
