BAGUIO CITY – Nakumpiskar ti nasurok P112-K a gatad ti mapapati a shabu ken natiliw ti innem a drug personalities iti nagsisina a buy-bust operations ditoy Baguio City iti uneg ti dua nga aldaw, July 25-26, 2021 kas paset ti nairtengan a kampanya kontra iti iligal a droga.
Natiliw iti operasyon sadiay Rizal Park ti High Value Individual (HVI) a ni Michael Orlanda Bassit, 50-anyos.
Nakumpiskar kenkuana ti dua a pakete ti mapapati a shabu nga agdagsen ti agarup nasurok 5.7 grams.
Natiliw met iti operasyon sadiay North Bakakeng ti HVI a ni John Michael Pamittan Damian, 33-anyos ken dagiti kakadwana a da Vivian Singson, 52-anyos ken Leandro Santos Canalete, 40-anyos, agpada nga Street Level Individual.
Nakumpiskar kadagitoy ti uppat a pakete ti mapapati a shabu nga agdagsen ti agarup nasurok tallo a gramo.
Natiliw metlaeng iti operasyon sadiay Kagitingan Barangay dagiti HVI a da Fernan Buayan Vicente, 32-anyos ken Jefferson Torres Dulay, 29-anyos.
Karaman ni Dulay iti Regional Top Ten iti drug watch list ti PNP-Cordillera.
Nakumpiskar kadagitoy ti maysa a bulto ti mapapati a shabu nga agdagsen ti agarup nasurok lima a gramo.
Nakumpiskar pay kenni Dulay ti maysa a pakete ti mapapati a shabu nga agdagsen ti agarup nasurok 2.5 a gramo.
Agarup nasurok iti 16.2 a gramo ti kadagsen dagiti nakumpiskar a mapapati a shabu ken aggatad dagitoy iti agarup nasurok P112,260.
Iti agdama, sumangsango dagiti innem a drug personalities iti kaso a panaglabsing iti RA 9165 wenno ti Comprehensive Dangerous Drugs Act of 2002.
