Nadangran ti innem nga overseas Filipino workers (OFWs) iti missile attacks nga insayangkat ti Iran idiay Israel pakairamanan ti maysa a Filipina caregiver a kritikal ti kasasaadna kalpasan a nagsagrap ti nakaro a pannakadangran iti puso ken barana, sigun iti Philippine Embassy idiay Tel Aviv, Israel idi kalman.
Dagos met a binisita ti embahada ti babai iti Intensive Care Unit ti Shamir Medical Center.
Sigun kenni Philippine Ambassador to Israel Aileen Mendiola Rau, adda gayam ti walo a medical cases a nakairamanan dagiti Pilipino, ngem dua kadagitoy ti maternity cases.
Malaksid iti caregiver a kritikal unay ti kasasaadna, adda pay sabali a Pilipino ti “moderately critical” ti kasasaadna bayat a dagiti dadduma ket nakaruardan iti ospital.
Kaaduan a natamaan ti missile attack ket kadagiti residential areas.
Kabayatanna, maibasar iti datos ti embahada, nasurok a 30,000 ti Pilipino ti adda sadiay Israel.
Iti agdama, nakaalerto latta dagiti maseknan nga ahensia idiay Israel ken Iran para kadagiti Pilipino nga agkasapulan ti tulong.
