Pinaneknekan dagiti drug examiners ti St. Luke’s Medical Center – Global City ita nga aldaw, Mayo 13, a ti cocaine test nga inaramid ni Presidente Ferdinand “Bongbong” Marcos Jr. idi Nobiembre 2021 ket pudno a negatibo ti resultana.

Bayat ti panagtultuloy ti hearing iti Senate Committee on Public Order and Dangerous Drugs, kinuna ni drug analyst Geresza Reyes a nagpirma iti drug test report ni President Marcos idi 2021 a negatibo ni Marcos para iti “cocaine”.

Inlawlawag met ni Dr. Cecilia Lim, dadaulo iti drug testing laboratory iti St. Luke’s Medical Center – Global City ken maysa metlaeng a nagpirma iti “drug test report” a ti resulta ket rimuar kalpasan ti dua a minutos ken 54 a segundo kalpasan a naipatungpal ti nasao a test.

Kinunana a posible gamin a rumuar ti resulta iti nasapsapa a kas iti 40 wenno agingga 50 a segundo ngem ti naituding nga oras.

Maipalagip nga idi Nobiemre 2021, naipasidong ni President Marcos iti “cocaine test” ken naisubmitir iti resultana a negatibo iti law enforcement agencies.

Daytoy ket kasaruno ti impablaak ni sigud a President Rodrigo Duterte a nagpositibo ni President Marcos iti iligal a droga.