Pimmusay ti maysa a pasahero ti flight SQ 321 (Boeing 777-300ER) bayat a nasurok tallo pulo dagiti nadangran kalpasan a nagsabali ti direksyon ti nasao nga eroplano nga agturong kuma sadiay Singapore.
Napasamak ti insidente gapu iti nakaro a turbulence iti tangatang.
Ti pimmusay ket nabigbig a maysa a lalaki , british national nga agtawen ti 73.
Sigun iti Singapore Airlines(SIA), naiturong ti direksyon ti nasao nga eroplano sadiay Bangkok nu sadino, nag-emergency landing daytoy sadiay Suvarnabhumi Airport iti oras ti 3:45 ti malem ti May 21.
Pakabuklan met a 211 a pasaheros ken 18 a crew members ti nilaon ti nasao nga eroplano.
Manarimaanen ti panakaexamine ken panakataming dagitoy iti metlaeng airport sadiay Bangkok, kasta met ti panakaikoordinar ti nasao nga airline kadagiti otoridad sadiay Thailand para iti panakaipaay ti medical assistance kadagiti pasaheros.
Kabayatanna, impasigurado ni Singapore Transport Minister Chee Hong Tat a mangipaay ti gobyerno dagitoy ti tulong kadagiti pasaheros ken kadagiti pamilya dagitoy.
Ti nasao nga eroplano ket naggapo sadiay London Heathrow nga agturong kuma sadiay Singapore.
