--Ads--
BAGUIO CITY – Pimmusay ti maysa nga ubing a lalaki kalpasan a nalnem iti dan-aw iti sangwanan ti Sinapangan Elementary School sadiay Sinapangan, Bangued, Abra idi malem kanikadua.
Nabigbig daytoy a ni Michael Alcid Buenafe, 7-anyos, Grade 2 iti Sinapangan Elementary School ken residente ti nasao a lugar.
Maibasar iti report, aglanglangoy ti biktima ken ti dua a kaadalanna iti dan-aw iti sangwanan ti pagadalan dagitoy.
Kinuna dagiti kaadalan ti biktima a limmagto daytoy iti nauneg a paset ti dan-aw ken kalpasan ti sumagmamano a minutos ket nagpaarayat ti biktima.
Inispal ti maysa a maseknan nga umili ti biktima ken intarayna iti Seares Memorial Hospital sadiay Bangued, Abra ngem naideklara a dead on arrival ti nasao nga ubing.
