BAGUIO CITY – Agtultuloy ti panakailista ti nangato a kaso ti COVID-19 ditoy rehion Cordillera.
Maibasar iti kaudian a datus ti Department of Health-Cordillera iti 10:30PM idi rabii, nakailista ti rehiyon iti 719 a baro a kaso ti COVID-19 idi laeng kalman, Aptil 3 nupay 711 ditoy ti nasken a maipasidong paylaeng iti beripikasyon.
Nailista met ti 160 a panagimbag a bukbuklen ti maysa sadiay Abra, sangapulo ket dua sadiay Apayao, uppat a pulo ket uppat iti Baguio City, sangapulo ket lima sadiay Benguet, sangapulo ket tallo sadiay Ifugao, tallo pulo ket pito sadiay Kalinga ken tallopulo ket walo sadiay Mt. Province.
Kabayatanna, nailista met ti pito nga ipupusay a konektado iti COVID-19 a bukbuklen ti saggaysa a kaso sadiay Abra, Benguet ken Kalinga bayat a sag-dua ditoy Baguio City ken sadiay Mt. Province.
Mainaig ditoy, inwaragawag ti La Trinidad, Benguet a sukimaten ti lokal a gobyerno ti panagsuroy dagiti panganan sadiay iti kaadda ti partitions kadagiti lamisaan bayat a madutukan dagiti pulis, dagiti deputized Citizenship Advancement Training Corps ken dagiti Army Reservists iti panakasurot dagiti health protocols kadagiti parapubliko a jeep.
