(Photos © Aguinaldo MDRRMO)
BAGUIO CITY – Pimmusay ti pito nga indibidual bayat a nadangran ti tallo a dadduma pay kalpasan a natnag iti rangkis ti maysa nga elf truck iti deppaar ti Galonogon-Ubao National Highway sadiay Montonop, Ubao, Aguinaldo, Ifugao idi agsapa.
Nagtaud ti lugan sadiay Majlong, Aguinaldo ken paturong kuma iti maysa a lamay sadiay Ubao, Aguinaldo idi natnag iti rangkis kalpasan a napukawan ti preno.
Sigun kenni Pol. Lt. Ricardo Dumangeg, hepe ti Aguinaldo PNP, agkakabagian dagiti biktima a bin-ig a residente ti Aguinaldo, Ifugao.
Nabigbig dagiti pimmusay a da Joey Tambiyag a driver ti truck, ti asawana a ni Divina Tambiyag, da Whilma Chumatog, Josephine Uhuban, Ricky Chog-ap, Rosita Paynohon ken Vicente Buyag-ao.
Nabigbig met dagiti nadangran a da Artisto Paynohon, Kimberly Joy Tambiyag ken Fernando Bahiwag nga ita ket matamtaming iti pagagasan.
Agtultuloy pay ti imbestigasyon ti pulisya iti pudno a rason iti napasamak nga insidente.
