Agtultuloy ti panangipatungpal dagiti otoridad idiay West Bandung, Indonesia iti search and rescue operations kadagiti biktima ti landslide a napasamak sadiay idi kalman
Sigun iti spokesperson ti disaster mitigation agency iti Indonesia, adu dagiti mapukpukaw nga indibidwal gapu iti nasao a didigra bayat a dumanon metten iti pito(7) ti bilang dagiti pimmusay.
Iti statement met ti maseknan nga istasyon ti pulisya, dumanon iti 30 a pagtaengan ti naapektaran iti napigsa nga ayos ti danum ken nargaay a daga manipod iti Mount Burangrang.
Napasamak daytoy bayat a kaadwan kadagiti residente iti nasao a disso ket matmaturog.
Sigun iti otoridad, ti landslide ket napakuyugan ti flashflood a nangapektar iti mapatta-patta a trenta nga ektarya iti daga.
Kabayatanna, tapno maliklikan ti panakanayon dagiti posible a maapektaran ket imbilin ti lokal a gobyerno ti panagbakwit dagiti residente nangruna dagiti adda iti naririsgu a disso.
