BAGUIO CITY – Dumanon iti 70% kadagiti personnel ti Baguio City Police Office (BCPO) ti interesado nga agpabakuna kontra iti COVID-19 bayat 30% kadagitoy ket agdua-dua paylaeng no agpabakunada wenno saan.
Sigun kenni BCPO Deputy City Director for Administration PLt.Col. Edward Aquintey, daytoy ti nagbalin a resulta ti survey nga insayangkatda idi napalabas a lawas kadagiti kameng ti pulisya iti siudad.
Panggep ti survey a maamuan ti interes dagiti pulis iti COVID-19 vaccination program ti lokal a gobierno ti Baguio.
Nupay kasta, kinunana nga agtultuloy latta ti information dissimenation nga isaysayangkat dagitoy babaen iti panakibinnadangda iti City Health Services Office tapno maimpormaran dagiti dadduma pay a personnel ti BCPO seknan iti nasao a panagbakuna.
Kagiddan iti daytoy, dinakamat ni PLt.Col. Aquintey a manamnama a mangbukel ti BCPO iti security plan para kadagiti COVID-19 vaccines a maisangpet iti siudad.
Maipalagip a karaman dagiti pulis kadagiti maipanruna a mabakunaan kontra iti COVID-19 gaputa frontliners dagitoy iti kampanya kontra iti nasao a sakit.
