Kinumpirmar ti lalaki a nangipila ti reklamo kontra kenni Davao City Rep. Paolo Duterte ti mapapati a panangdangaran ken panangpangta, nga isuna ken ti kongresita ti adda iti viral video bayat nga adda iti uneg ti maysa a club.
Sigun kenni Kristone John Patria Sion, insubmitirna ti video iti Department of Justice, ngem pinaglibakanna nga isuna ti nangiwaras ti video iti online.
Iti video, maimatangan gamin ti maysa a lalaki a naka-iggem ti kutsilio ken dangdangranna ti maysa a lalaki a nakasuot ti kallugong.
Adda ita iti kostodia ti pulisia ni Sion, ken inaklonna a nangitugot isuna ti babbai kadagiti kliyentena.
Sigun kenni Sion, Pebrero baente dos idi nagpaala ti immawag kenkuana ti sumagmamano a babbai para kadagiti bisitana, karaman ni Duterte, nga inaramidna met.
Kalpasan ti mapapati a panagtaripnong kenni Duterte, nagturong kano ti grupo iti maysa a bar iti ala una ti agsapa idi Pebrero baente tres.
Sigun kenni Sion, nakapungtot ni Duterte idi naamuanna nga adda ti kadwana a saan a naipaayan ti partner.
Mapapati nga ad-adda a nakapungtot ni Duterte idi naaddaan ti pakaseknan ti bayad kadagiti babbai ken nakompronta isuna.
Kinuna ni Sion a saan a dagos a nagparang gaputa nagsapul paylaeng isuna ti ebidensia iti napasamak kenkuana.
Dinakamatna a naigiddan laeng ti panagparangna iti panawen ti eleksion.
Mapapati a boluntario daytoy a nangipila iti reklamo kontra kenni Duterte.
Iti agdama, awan pay ti komento ni Duterte, ngem immunan a kinunana nga am-ammuen dagiti abogadona nu pudno ti video.
