Guygoyugouen iti dadaulo iti John Hay Management Corp. (JHMC) dagiti bisita a mangisayangkat iti umno a panangibelleng iti basura kalpasan a nalidayan kadagiti basura a binaybay-an dagiti nagpicnic iti Camp John Hay.
Inladawan ni JHMC President at CEO Manjit Singh Reandi ti kasasaad kas “nakalkaldaang,” ken kinunana a dagiti nabaybay-an a basura ket mangpirdi kadagiti panagregget a pagtalinaeden ti kinadalus iti forest reservation.
Sigun kenni Reandi, numan pay adda dagiti nadutukan nga agdalus tapno pagtalinaeden ti kinadalus iti lugar, saan a rumbeng a rason tapno baybay-an dagiti bisita dagiti basurada.
Impaganetgetna metlaeng a ti panagtalinaed ti kinadalus ket responsibilidad iti amin ken saan laeng a kadagiti maintenance personnel.
Gapu iti napasamak, idagdagdagna iti publiko a suruten ti Clean As You Go wenno CLAYGO policy, a sigun kenkuana ket maysa a simple ngem epektibo a wagas tapno maaywanan ti aglawlaw.
Innayon pay ni Reandi a ti nasayaat a panangibelleng iti basura ket kasapulan nga agbalin nga ugali, ken ti panangibelleng iti aniaman a lugar ket mangipakita iti kinaawan iti panagraem iti aglawlaw ken iti pada a bisita.
Kiniddawna kadagiti residente ken turista nga agbalin a responsable kadagiti basura ken tumulong a pagtalinaeden ti kinadalus iti aglawlaw iti Camp John Hay.
