BAGUIO CIT -Dumanonen iti 77% kadagiti nasurok 32,200 a rehistrado a senior citizens iti siudad ti Baguio ti naan-anay a nabakunaan wenno nakakompleto iti bakuna kontra iti COVID-19.
Sigun kenni City Health Services Officer Dr. Rowena Galpo, resulta daytoy ti panaggaed dagiti Barangay Health Emergency Response Teams (BHERTs) tapnu mabirukan dagiti natataengan iti siudad a saan pay a nabakunaan.
Kinunana nga iti kaudian a datusda ket nasuroken iti 24,800 a senior citizens iti siudad ti fully vaccinated bayat a 6% wenno nasurok 2,000 ti agur-uray iti maikadua a dose dagitoy.
Innayonna nga agtultuloy met latta ti panagbiruk dagiti BHERTs iti 17% wenno kadagiti 5,285 a saan pay a nabakunaan a senior citizens iti siudad.
Inyunay-unayna a para iti proteksion dagiti senior citizens ken iti pamilyada ti panakabakuna dagitoy.
Impannakkel met ni Mayor Benjamin Magalong a narikna ti epekto ti vaccination program para kadagiti senior citizens gaputa manipud bulan ti Abril ket bimmaba ti bilang dagiti matmatay iti nasao a sektor.
Imbilinna metten ti panakaipaay ti insentibo kadagiti barangay a makabakuna iti agarup amin a senior citizens daytoy a maited inton September 1 kagiddan ti panakarambak ti Baguio Day.
