Pimmusay ti maysa a lalaki nga agtawen ti pito pulo ket walo manipod iti Central Luzon kalpasan a sinindianna ti Judas belt a paputok kas maibasar iti report ti Department of Health (DOH).
Sigun kenni Department of Health Assistant Secretary Dr. Albert Domingo, ti senior citizen a taga-Central Luzon ket naospital idi Disiembre baente dos kalpasan a sinindianna ti nasao a paputok, ngem pimmusay idi Disiembre baente siete.
Kinuna ti asawa ti biktima nga ur-urnosen ni lakayna dagiti daan a suplay ti paputok ken mangikabil iti pulbura iti tengga ti nainit a panawen sakbay ti aksidente.
Ti biktima ket umuna a nairekord a pimmusay gapu iti paputok sakbay ti Baro a Tawen 2025.
Manipod idi Disiembre 28, iti agdama a tawen, nakairekord ti Department of Health (DOH) iti pakabuklan a 125 a fireworks-related injuries, nga addaan ti duapulo ket uppat a baro a kaso a naireport.
Ti agdama a bilang ti nadangran ket 29% a nangatngato nu idilig ti siam a pulo ket pito a kaso a nairekord idi December 28, 2023.
Mainaig iti dayta, impakaamo ni Department of Health Assistant Secretary Dr. Albert Domingo a kaaduan kadagiti nadangran ket manipod iti nagduduma a rehion a kas idiay Metro Manila, Central Luzon, Cagayan Valley, Western Visayas, Ilocos, ken Central Visayas.
Manipod iti 125 a biktima, 102 ti agtawen ti sangapulo ket siam ken ub-ubing pay.
Iti nasao a bilang, 114 ti lalaki, ken 11 ti babai.
Agtultuloy ti panangmonitor ti Department of Health kadagiti pannakadangran gapu iti paputok ken aktibo nga idagadag ti nasao nga ahensia iti publiko a liklikan ti panagaramat iti paputok bayat nga umas-asideg ti selebrasion ti Baro a Tawen.
Aw-awagan ti nasao nga ahensia ti publiko nga agbirok ti nasayaat a wagas ti panagrambak ti bakasion tapno maliklikan ti trahedia.
