BAGUIO CITY – Pimmusay ti maysa nga estudyante kalpasan nga aksidente a naatalan ti maysa a van sadiay Mankayan-Abatan National Road, Poblacion, Mankayan, Benguet idi kanikadua.
Ti biktima ket agtawen iti walo, grade IV pupil ken residente ti Payeo, Bedbed, Mankayan, Benguet.
Kabayatanna, nabigbig ti driver ti van nga addaan iti palaka nga ABK-4414 a ni Ryan Brent Silipen Camba, 21, ken residente ti Otocan Norte, Bauko, Mt. Province.
Maibasar iti inisyal nga imbestigasyon ti pulisya, bayat ti panagdalyasat ti van iti nasao a kalsada ket killaat daytoy a nagatras agingga a naatalan ti biktima.
Naamuan a nakita ti driver ti biktima iti side mirror ngem saanna a nadlaw a naatalan daytoy.
Intaray ti driver ti biktima iti RHU Infirmary Clinic sadiay Poblacion, Mankayan, Benguet ngem naideklara a dead on arrival.
Iti agdama ket adda iti kustodiya ti Mankayan PNP ti driver bayat a naipasidong iti impoundment ti lugan daytoy.
