BAGUIO CITY – Adda ita iti natalged a kasasaad dagiti pito nga indibidual a nadangran kalpasan a natupakan iti dakkel a bato ti nagluganan dagitoy a van iti deppaar ti Kennon Road, partikular sadiay Kaipilan, Camp 3, Tuba, Benguet idi kalman.
Nabigbig ti driver ken agtagikua iti nasao a van a ni Aldiane Reyes Suares, 32-anyos bayat a nabigbig dagiti pasahero na a da Christian Nico Bañaga, 31-anyos; Rona Suarez Legaspi, 30-anyos; Roella Bañaga, 28-anyos; Rogelio Legaspi, 57-anyos; Merideth Galicia Legaspi, 56-anyos; ken ti dua nga ubbing a da Sofia Suarez, 2-anyos ken ni Nicollas Bañaga, 1-anyos.
Naamuan nga amin dagiti biktima ket agkakabagian manipud Planas Street, Tondo, Manila.
Maibasar iti imbestigasion dagiti pulis, pasalog ti van nga addaan plaka a PIT 372 iti nasao a kalsada.
Kabayatan ti panagdalyasat ti van iti nasao a lugar, nargaay manipud iti ngato ti bantay dagiti dakdakkel a bato ken aksidente a natamaan ti kanawan a paset ti passenger side iti sangwanan ti van.
Nangitunda daytoy iti panakapukaw ti kontrol ti driver iti manibela ti lugan a nagresulta met iti panakaidungpar ti van iti kongresto nga alad.
Dagus met a nagresponde dagiti kameng ti Tuba Emergency Medical Services ken ti 911 on Call para iti panakaispal ken panakaitaray dagiti biktima iti Baguio General Hospital and Medical Center.
