BAGUIO CITY – Nagballigi manen dagiti operasyon kontra iti iligal a panagsugal nga impatungpal dagiti pulis iti nagduduma a paset ti rehion Cordillera idi napalabas a lawas.
Maibasar iti datus ti Cordillera PNP, nangitunda dagiti nasao nga operasyon iti panakakemmeg ti walo a suspek ken panakakumpiskar ti P3,990 a taya; tallo a pang-pallot ken nagduduma a gambling paraphernalia.
Nakemmeg dagitoy sadiay Atok, Benguet; Tabuk City, Kalinga ken Banaue, Ifugao.
Naipila metten ti kaskenan a kaso kontra kadagiti nakemmeg nga indibidual.
Kagiddan iti daytoy, umap-apela manen kadagiti umili iti rehion ni PCSupt. Edward Carranza, dadaulo ti Cordillera PNP para iti agtultuloy a panangsuportarda iti pulisya iti kampanya kontra iti iligal a sugal babaen iti dagusda a panangireport iti pulisya no adda ti makitada kadagiti nasao nga iligal nga aramid.
