(UPDATE) BAGUIO CITY – Pimmusay ti walo a tattao bayat a 14 ti nadangran iti panakatnag ti maysa dump truck nga addaan plaka a BCN 592 sadiay Sitio Binongsay, Malin-awa, Tabuk City, Kalinga idi kalman.
Karaman kadagiti pimmusay da Ghelyn Khim Gallema, 13-anyos; Rufina Limto Damagon, 49-anyos; Jules Mangagom Alvester, 7-anyos, Edmund Mangagom, addaan iti legal nga edad, Crisanta Casirayan, Rosita Mangagom, Doming Matalang, ken ni Gaspar Edoc.
Nabigbig met dagiti nadangran a da Luming Gallamoy, Willy Salida, Cecilia Balangui, Stallon Mangagom, Purinomo Galamto, Divine Mangagom, Elvira Otal Simangon, Aprilyn Otal, Basilio Baydon, Dominador Casirayan, Corazon Matalang, Kiefer Gallamoy Simangan, Nelia Malawis Sabaway, ken ni Jeniffer Malawis Sabaway a bin-ig a residente ti New Tanglag, Tabuk City, Kalinga.
Sigun iti Bureau of Fire-Kalinga, kaaduan kadagiti biktima ket addaan iti ligal nga edad bayat a sumagmamano kadagiti pimmusay ken nadangran ket menor de edad.
Sigun iti driver a ni Mark John Lazaro, 20-anyos, ken residente ti Mosimos, Dupag, Tabuk City, agturong koma ti dump truck sadiay Barangay Balawag tapno tumabuno dagiti pasaheros iti maaw-awagan a “Posipos” a maysa a tradisional nga aktibidad sadiay Kalinga.
Nupay kasta, idi nakadanonda iti pasang-at a paset ti kalsada ket napaay ti driver a mangi-shift iti lower gear a nagresulta iti panagatras ti lugan agingga a natnag iti rangkis nga addaan kauneg nga agarup lima a metro sakbay a bimmaliktad ken natumba.
Dagus met a simmuko ti driver kadagiti otoridad ken ita ket agpapaimbag pay laeng iti pagagasan dagiti biktima.
