BAGUIO CITY – Nakemmeg ti maysa a first year HRM student a turista kalpasan a nakumpiskar kenkuana ti 10 a marijuana bricks iti interdiction operation nga insayangkat dagiti operatiba ti PNP ken PDEA iti deppaar ti Bontoc-Kalinga Road idi kalman.
Nabigbig daytoy a ni Kevin Lhar Blanco Aguila, 18-anyos, baro ken residente ti Tuktukan, Taguig City.
Nakumpiskar manipud iti backpack-na ti lima a marijuana bricks bayat a nakumpiskar iti maysa pay a backpack-na ti lima a kanayonan a marijuana bricks nga aggatad amin iti agarup P1.2-M.
Kabayatanna, narekober met ti 35 a marijuana bricks nga aggatad ti P4.2-M manipud iti tallo a bags nga imbati dagiti saan pay a nabigbig nga indibidual iti uneg ti maysa a panganan sadiay Poblacion, Bontoc, Mountain Province idi Biyernes, August 2.
Sigun kadagiti otoridad, nagdua-dua ti akinkukua iti establishimento iti linaon ti dua a backpacks ken maysa a travelling bag a naibati iti establishimentona isut gapuna a dagus a nagpatulong iti pulis.
Dagus a sinukimat dagiti operatiba ti PNP ken PDEA dagiti nasao a bags ken ditoy a nasarakan dagiti kontrabando.
Manarimaan ita ti imbestigasyon para iti panakabigbig dagiti akinkukua kadagiti nasao a bags nangruna ta saan a nadlaw ti akinkukua iti establishimento no asino ti nangibati kadagiti nasao a bags nga ita ket adda iti kustodiya ti PDEA-Cordillera.
Kabayatanna, nakumpiskar met manipud iti dua a mapapati a drug couriers ti 35 a marijuana bricks nga aggatad ti P4.2-M iti checkpoint operation nga insayangkat dagiti otoridad sadiay Km. 13, Acop, Caponga, Tublay, Benguet idi Sabado, August 3.
Nabigbig dagiti nakemmeg a da Aldren Bombio Rabutan, 20-anyos, baro, estudyante, residente ti Tondo, Metro Manila ken ti kadwana a lalaki a menor de edad.
Pinasardeg dagiti otoridad ti maysa a parapasahero a bus a nagtaud sadiay Bontoc, Mountain Province ken paturong iti siudad ti Baguio City a nagresulta iti panangsukimatda iti imet ti suspek a dua a backpacks a nakakitaan kadagiti nakumpiskar a kontrabando.
Immuna metten a kinuna dagiti otoridad a manarimaan ti imbestigasyon iti modus a panangbayad dagiti sindikato kadagiti agtutubo nga agpammarang a turista a sumarungkar ditoy Cordillera ken iti panagsubli dagitoy sadiay Metro Manila ket addan ti imetda a marijuana.
