BAGUIO CITY – Nakemmeg ti 82 nga indibidual bayat a nakumpiskar ti 15 a nagduduma a paltog ken pampabettak iti dua nga aldaw nga operasyon dagiti pulis ditoy rehion Cordillera.
Sigun iti Cordillera PNP, paset daytoy ti nairtengan nga aksion dagiti pulis kontra iti amin a kita ti kriminalidad.
Maibasar iti listaan, 58 kadagiti nasao nga indibidual ti nakemmeg kalpasan a naiserbi ti warrant of arrest dagitoy bayat a ti 16 a dadduma pay ket nakemmeg kabayatan ti implementasyon ti 15 a search warrants iti entero a pagilian ken ti 8 a nabatbati ket nakemmeg gapu iti iligal a panagsugal.
Nangitunda pay ti panakaiserbi dagiti search warrants iti panakakumpiskar ti 15 a nagduduma a paltog, 120 a pidaso ti nagduduma a bala, 6 a pidaso ti magazines para iti nagduduma a bala, 1 MK fragmentation hand grenade, 189 a pidaso ti blasting caps, 2 a rolyo ti safety fuse ken 0.5 kg Ammonium Nitrate/Fuel Oil.
Impannakkel pay ti Cordillera PNP ti panakakemmeg dagiti uppat a Top Most Wanted Person (TMWP) iti nagduduma nga istasyon dagiti pulis iti rehion a nabigbig a da Rudy De Guzman a No. 7 TMWP ti Ifugao; Ace Escudero a.k.a. Jarel Cabresos Cagara a.k.a. Jebrill a No. 2 TMWP ti Baguio City Police Office – Station 4; Dexter Caligtan a No. 7 TMWP ti La Trinidad ken ni Amilyn Toni a No.3 TMWP ti Tubo, Abra.
Nakakumpiskar pay dagiti pulis iti nagduduma a kayo nga aggatad ti nasurok P54,000 manipud Mt. Province ken Ifugao bayat a nadadael ti nasurok P9-M a gatad ti marijuana sadiay Tinglayan, Kalinga malaksid a nakumpiskar ti 18 a sachets ti mapapati a shabu ken maatap a marijuana iti implementasyon ti search warrants sadiay Buguias, La Trinidad ken Tuba iti probinsia ti Benguet.
Nailista ti Baguio City Police Office ti kaaduan a bilang dagiti nakemmeg nga indibidual a naglabsing iti linteg a dimmanon iti 25, simmaruno ti Benguet ken Abra a nakakemmeg ti sag-14, maikatlo ti Kalinga a nakakemmeg ti 12, Ifugao a 7 ken Apayao ken Mt. Province a sag-5.
Dinayaw met ni PROCOR RD PCSupt Edward Carranza ti naaramidan dagiti pulis iti rehion bayat nga inapresiarna dagiti umili ti rehion gapu iti kooperasyon dagitoy kadagiti nagduduma nga operasyon nga impatungpal dagiti pulis.
