BAGUIO CITY – Nailista ti Baguio idi agsapa ti maikadua a kababaan a temperatura para iti siudad ita a tawen 2021.
Sigun kenni PAGASA-Baguio weather specialist Letty Dispo, alas sais kwarenta idi agsapa ket nailista ti 9.5°C a temperatura ti siudad.
Kinunana a dimmanon met iti 10.8°C iti deppaar ti La Trinidad, Benguet ken nasurok 7°C iti radar station ti PAGASA-Baguio sadiay Mount Santo Tomas, Tuba, Benguet.
Nupay kasta, nababbaba latta ti temperatura iti dadduma a munisipyo iti Benguet, Mountain Province ken Ifugao gapu iti nangatngato a lokasyon dagitoy.
Inlawlawag ni Dispo nga aktibo paylaeng ti northeast monsoon wenno amian a mangituntunda iti nababa a temperaruta iti lokaliadad ken manamnama nga agpaut daytoy agingga iti umuna a lawas ti Marso.
Maipalagip a nailista idi January 30 ti 9.4°C a kababaan a temperatura ti Baguio para iti 2021.
Maibasar pay iti rekord, nailista ti 6.3°C a kababaan a temperatura iti City of Pines idi January 18, 1961.
