Baguio City- Nakumpiskar dagiti otoridad ti 97.13 kilos a nadadael a karne ken produkto ti ikan kadagiti “talipapa” wenno satellite markets ditoy siudad ti Baguio.
Iti “spot inspections” a naisayangkat kadagiti barangay San Vicente, Kias, Loakan, ken Camp 7, naduktalan dagiti otoridad a saan a maikari a kanen ti tao dagiti nadadael a karne ken produkto ti ikan gapu iti saan a nasayaat a panag-“handle” kadagitoy.
Naibelleng dagiti nadadael a lako iti Baguio City Veterinary and Agriculture Office.
Kinumpiskar met dagiti otoridad ti dua kadagiti 46 a nainspeksion a timbangan gapu ta adda depektona.
Dagiti aglabsing iti Republic Act 9296 wenno iti Meat Inspection Code of the Philippines ket mabalin a mamulta iti saan a nababbaba ngem P100,000 ngem saan a nasursurok ngem P1 million.
Kabayatanna, mabalin a mamulta iti P1,000 agingga iti P5,000 dagiti maduktalan a manglabsing iti zoning requirements, shop planning and design, electrical ken lighting requirements, sanitation requirements, ken solid waste management ken posible a maipasango iti pannakaiserra ti negosio.
