BAGUIO CITY – Nainget itan ti panagsagsagana ti Baguio Athlete ken paralympian a ni Agustina Bantiloc para iti umadani a 2017 Philippine National Games a maangay sadiay Ilagan City, Isabela inton Hulyo.
Tarigagay ni Bantiloc a maasa pay ti abilidadna para iti archery iti baet ti disability daytoy ken uray no addaanen daytoy iti anak nangruna ta tarigagayna ti mangipaay iti inspirasion ken pagwadan kadagiti padana a Persons With Disability (PWDs).
Inyunay-unay ti atleta nga iti las-ud ti 16 a tawenna iti sports ket saan a pulos daytoy a napukawan iti namnama uray no agkurkurang daytoy iti pinansial nga aramatenna para iti panagsanay daytoy.
Ni Agustina Bantiloc a tubo ti siudad ti Baguio ket nakaawaten iti sumagmamano a gold, silver ken bronze medal manipud kadagiti international competitions iti nagduduma a paset ti lubong.
