BAGUIO CITY – Naituding a maisangpet ditoy siudad ti Baguio ita nga aldaw ti bangkay ti pulis a taga-Baguio a napapatay sadiay Marawi City.
Immunan a nabigbig ti nasao nga opisyal a ni P/Sr. Insp. Freddie Solar, tubo ti Pangasinana, naipasngay ken dimmakkel ditoy siudad, partikular iti Aurora Hill ken daytoy ket miembro ti PNPA “Sansinirangan” Class of 2007.
Sigun kenni Susan Solar Urbano, kabsat ti nasao a pulis, saanen a maaramat ti naikari a C-130 heavy-lift transport aircraft a pakailuganan ti bangkay ti kabsatna ngem nakasaganan ti panakaibiahe ti bangkay ti kabsatna manipud Surigao paturong iti Butuan ken manamnama a makadanunda sadiay Manila iti alas nuebe ita nga agsapa.
Kinunana a manipud Manila ket tumulong ti Baguio City Police ken ti Highway Patrol Group iti panakaiyawid ti bangkay ti kabsatna ken malamayan iti maysa a punerarya sadiay Marcos Highway agingga inton June 4.
Nalaus met ti panagyamanna iti lokal a gobyerno ti Baguio ken kadagiti kaadalan ti kabsatna iti PNPA Class of 2007 gaputa dagitoy ti manggastos iti panakaibiahe ti kabsatna ken iti panakalamay daytoy.
Maiyawid manen sadiay Surigao ti bangkay ni PSI Solar tapnu sadiay a maitabon gaputa sadiay daytoy a naikamang.
