BAGUIO CITY – Mangisayangkat iti job fair ti Department of Labor and Employment (DOLE) – Cordillera kadagiti duwa a kadakkelan a mall (SM ken Portavaga Mall) ditoy siudad ti Baguio inton Hunyo 12.
Segun kenni DOLE-Cordillera Regional Director Exequiel Ronie Guzman, babaen iti nasao a job fair ket maipaayan iti gundaway wenno oportunidad nga agtrabaho dagiti indibidwal nga agbirbirok iti trabaho.
Kinunana a dumanon iti 30 agingga 40 a kompanya ti mangidiaya kadagiti trabaho para iti lokalidad ngem awan dagiti mangidiaya iti trabaho iti ballasiw-taaw.
Innayona a karaman kadagiti imbitaranda a makipaset iti nasao a job fair ti Philippine Drug Enforcement Agency ken ti Philippine National Police gaputa iti agdama ket umaw-awat pay dagitoy iti aplikante.
Mangipatungpalda metlaeng iti counseling para kadagiti negosyante ti micro, small and medium enterprises tapnu manayunan pay ti panaka-ammo wenno ideya dagitoy iti panagnegosyo.
