BAGUIO CITY – Duktalen ti Benguet Provincial Police Office ti posible a koneksion ti maysa a kapitan ti barangay kadagiti suspek iti panagpabettak sadiay Barangay Cabiten ken Barangay Colalo, Mankayan, Benguet idi kanikadua.
Sigun kenni Benguet Provincial Director PSSupt. Florante Camuyot, imbestigaranda no adda pakainaigan ti maysa a kapitan kadagiti suspek a maatap a kameng ti New People’s Army.
Kinunana a maysa a kapitan sadiay ti maatap a sigud a kameng ti rebelde a grupo.
Kabayatanna, kinuna ni Camuyot nga iti agdama ket “cleared” aminen dagiti lugar a pinabettak dagiti maatap a rebelde.
Naduktalan iti inisial nga imbestigasion a dagiti napabettak a kagawaan ket tagikua ti maysa a negosyante nga intsik ken ti nasao a kapitan, malaksid iti napabettak a COMPAC ti Mankayan PNP.
Kabayatanna, kinuna ni Lt. Col. Nicolas Quemado Jr., commander ti 54th Infantry Battalion ti Philippine Army, a posible a kameng ti Jennifer Cariño Command ti New People’s Army dagiti suspek iti panagpabettak sadiay.
Kinunana a nakarekober dagitoy iti surat iti nakapasamakan ti insidente ken nakalanad iti daytoy a kameng ti nasao a command dagiti suspek iti insidente.
Nupay kasta, kinunana a posible a dagiti suspek ket agpappabigbig laeng a kameng ti nasao a command tapno mabiag daytoy.
Kinunana a dagiti suspek ket maatap a nagtaud iti grupo dagiti NPA sadiay Ilocos Sur, Mt. Province ken Abra.
Kabayatanna, impanamnama ni Quemado nga iti agdama ket natalgeden ti aglawlaw ti Colalo ken Cabiten, Mankayan kalpasan ti panagraot sadiay dagiti maatap a rebelde isut gapuna nga awanen ti rumbeng a pagdanagan dagiti umili gaputa naurnosen ti seguridad sadiay.
Innayonna pay a makikaykaysa ti militar iti pulisya ken iti lokal a gobierno ti Mankayan tapno makabukel dagitoy iti plano tapno malapdan ti pannakapasamak ti kapada nga insidente.
