BAGUIO CITY – Manamnama a maisangpet inton bigat iti probinsia ti Benguet ti bangkay ni Pfc. Gener Tinangag a pimmusay iti pannakiranget ti tropa ti gobierno kontra kadagiti kameng ti Maute Group sadiay Marawi City idi Biernes.
Iti pannakipatang ti Bombo Radyo iti kabsat ti biktima a ni Euphenia Tinangag, kinunana a manipud sadiay Iligan City ket maiturong ti bangkay ti kabsatna sadiay Villamor Airbase, Metro Manila.
Malamayan ti kabsatna sadiay Fort Bonifacio, Taguig City agingga inton bigat ti rabii sakbay a maibiahe ti kabsatna paturong iti balay ti asawa daytoy sadiay Itogon, Benguet.
Dinakamat ni Tinangag nga iti social media a naammuanda ti ipupusay ti kabsatna ken nakumpirmarda daytoy idi timmawag iti pamiliada ti commanding officer ti kabsatna.
Nagkedked met ti pamilia Tinangag nga agkomento iti napagteng ti nasao a marino ken saanda pay a napagnunumuan no kaano ken no sadino ti pakaitabonan daytoy.
Ni Pfc. Tinangag ket agtawen laeng iti duapulo ket tallo ken tubo iti Lunas, Barlig, Mt. Province.
