BAGUIO CITY – Sumangsango ita iti kaso a robbery with violence ti dua a minero kalpasan a hinoldap-da ti maysa a foreman iti O-Shape Overpass, siudad ti Baguio idi kalman ti parbangon.
Nabigbig dagitoy a da Greg Matnao, 26 ken ni Danny Gannaban, 21, agpada a tubo ti Kalinga ken residente ti Kias, Baguio City bayat a ti biktima ket ni Alvin Aviso, 33, tubo ti Quezon City ken residente ti Gibraltar, Baguio City.
Segun iti pulisya, magmagna ti biktima iti overpass ken paawid kuman idi ginuyod daytoy ti suspek a ni Gannaban ken nagdawat daytoy iti kwarta.
Dagus a kinaot ti biktima ti sangapulo ket walo a pisos a barbarya iti bulsana ken intedna kadagiti suspek kagiddan ti panagpakpakaasina a saanda daytoy a dangran.
Nakaunget ti suspek a ni Matnao isut gapuna a dinanogna ti tengnged ti biktima.
Nagresponde met dagiti pulis ken inarestoda dagiti suspek kalpasan nga impulong dagiti concerned citizens ti nakitada nga ar-aramiden dagiti suspek.
