BAGUIO CITY – Pimmusay ti maysa a baket kalpasan a tinagtagbat daytoy ti kabsatna sadiay Barangay Alinaya, Pidigan, Abra itay nabiit.
Nabigbig ti biktima a ni Rosita Cabanilla Bandiez, 63-anyos, addaan asawa bayat a ti suspek ket ni Gertrudiz Cabanilla Elpa, 70-anyos, maysa a balo ken agpada dagitoy residente dagitoy iti nasao a lugar.
Maibasar iti report, naakawat iti tawag ti Pidigan Police mainaig iti nasao nga insidente ken iti panagrespondeda ket nasarakanda ti awanan biag a bagi biktima ken ti daradara nga ulo daytoy.
Naduktalan nga agbuybuya iti telebisyon ti biktima ken ti amponna nga agtawen iti dose idi killaat a simmangpet ti suspek ken sadiay a tinagtagbatna iti namin adu a daras ti ulo ti kabsatna babaen iti buneng.
Gapu iti daytoy, nagsagrap ti biktima iti adu a sugat a nangitunda iti dagus nga ipupusay daytoy bayat a nakemmeg ti suspek a sumangsango ita iti kaso a homicide.
Kinuna met ti suspek a napunoan daytoy iti kabsatna gapu iti kanayon dagitoy a panagsinnungbat.
