BAGUIO CITY – Nasarakan ti bangkay ti maysa a part-time driver iti sangwanan ti maysa a balay sadiay Dalnatan, Agtangao, Bangued, Abra idi agsapa kalman.
Nabigbig daytoy a ni Leopoldo Barbadillo Bernardez, 54-anyos, naasawaan, part-time driver ken residente iti nasao metlaeng a lugar.
Maibasar iti imbestigasyon ti Bangued Police, as-asikasuen ni Leonora Rebellon dagiti dinguenna a tallo a baka idi nakitana ti biktima a daradara a nakadasay iti sangwanan ti mismo a balay daytoy, kaabayna ti motorsiklona.
Naamuan a nagsagrap ti biktima iti dua a tama ti paltog, partikular iti baba a paset ti tiyan ken iti kanawan nga ubet.
Sigun met kadagiti kabagian ken kaaruba ti biktima, nakangngeg dagitoy iti dua a putok ti paltog idi tengngat rabii ti July 10.
Agtultuloy met ti imbestigasyon para iti panakaduktal ti posible a motibo ti krimen ken no asino dagiti suspek.
