BAGUIO CITY – Nakemmeg ti maysa a taxi driver kalpasan a dinangran ken tinakawanda iti kaduana ti maysa pay a taxi driver sadiay Palmaville, Puguis, La Trinidad, Benguet idi rabii.
Nabigbig dagiti suspek a da Jeoffery Velasco Adriatico, 40-anyos, taxi driver, tubo ti Ilocos Sur ken residente ti Tomay, La Trinidad ken ni Jessie Velasco, adda iti legal nga edad, taxi driver ken residente ti Irisan, Baguio City.
Nabigbig met ti biktima a ni Jackson Bogawan Amoyen, 31-anyos, naasawaan, taxi driver ken residente ti Buyagan, Poblacion, La Trinidad, Benguet.
Maibasar iti report, agin-inana ti biktima ken ti kaduana iti sangwanan ti refilling station sadiay Palmaville, Puguis idi killaat a nagparang dagiti suspek ken sadiay a pinakpak ti maysa kadagiti suspek ti muging ti biktima babaen iti bato.
Kalpasanna ket inalada ti sling bag ti biktima a naglaon iti koleksion daytoy a dumanon iti P1,400 sakbayda a naglibas babaen iti lugan ti suspek a ni Velasco.
Nabigbig met ti biktima ti suspek a ni Adriatico gaputa daytoy ti kaduada a naginom sakbay ti insidente.
Tinawagan ti biktima t maysa pay a kadua dagitoy a makaam-ammo met kenni Adriatico agingga a nasarakanda daytoy a nangitunda iti panakakemmegna sadiay Tomay, La Trinidad, Benguet babaen iti La Trinidad Police nupay nakalibas ti kadua daytoy a ni Velasco.
