BAGUIO CITY – Saan a naragsakan ti ama daydi SAF trooper PCI Cyrus Anniban iti rekomendasyon ti Ombudsman a panakaidatag ti kaso a graft ken usurpation of authority kontra kenni sigud a Presidente Benigno Aquino III.
Iti panakiuman ti Bombo Radyo, kinuna ni John Anniban a dagiti nasao a kaso ket rumbeng a maidatag kada sigud a PNP chief Alan Purisima ken sigud nga Special Action Force (SAF) commander Getulio Napeñas.
Kinunana a daytoy ket gapu iti panangidaulo ni Purisima iti operasyon iti baet ti panakasuspendir daytoy ken ni Napeñas gapu iti panangsurotna iti bilin ti nasuspendir nga opisyal.
Impettengna a treason wenno betrayal of public trust ti rumbeng a maidatag iti sigud a presidente gapu iti panakatay dagiti SAF commandos iti nasao nga operasyon.
Kinunana nga iti agpatnag nga engkwentro ket awan ti timmulong iti tropa ti gobyerno gapu iti stand down order dagiti nangangato nga opisyal, pammaneknek iti panangtraydor iti pagilian ken panangprotektar kadagiti kalaban.
Maipalagip a ni PCI Anniban ti nagserbi a deputy commander ti 55th Special Action Company iti naiyusuat nga OPLAN Exodus sadiay Mamasapano a nagresulta iti nadara a masaker idi 2015.
