BAGUIO CITY – Posible a biktima iti ‘stray bullet’ ti balasang a napaltogan ditoy siudad ti Baguio idi napalabas a bulan.
Sigun kenni Baguio City Police Office, City Director, PSSupt. Ramil Saculles, daytoy ket gaputa inikkatdan ti ‘third party’ ken personal a gura kadagiti motibo iti panakapaltog ti biktima a ni Jenalyn Rosimo, 21-anyos ken residente ti Buyagan, La Trinidad, Benguet.
Kinunana a tinutukanda amin dagiti posible nga anggulo iti napasamak a pammaltog ngem awan ti makitada a motibo tapnu mapuntirya ti biktima.
Dinakamatna a kas maibasar iti imbestigasyon dagitoy ket pangato ti direksion ti bala a timmama iti biktima, kaipapananna nga immuna a timmama ti bala iti kalsada.
Namnamaenna pay a maikkat ti bala iti ulo ti biktima iti kabiitan a panawen tapnu maipasidongda daytoy iti eksaminasyon ken makita no adda ti kapada daytoy kadagiti bala nga inalada manipud kadagiti paltog dagiti adda iti aglawlaw ti crime scene.
Maipalagip a napasamak ti pammaltog sadiay Otek St. idi paturong ti biktima iti jeepney terminal ti Baguio Country Club.
Agturpos kuma daytoy a cum laude iti Benguet State University ngem saan a nakamartsa idi July 4 gapu iti napasamak nga insidente.
