BAGUIO CITY – Agpapaimbag ti walo a pasahero manipud iti sangapulo ket innem a pasahero pakairamanan ti driver a nadangran iti panakatumba ti naglugananda a jeep sadiay Sitio Mangnao, Barangay Saliok, Natonin, Mountain Province idi kalman.
Segun iti Police Regional Office Cordillera, daldalyasten ti jeep nga addaan iti plaka a DSX FI8 nga imanmaneho ni Celso Bagyan a taga-Buguias, Benguet ti nasao a kalsada paturong sadiay Paracelis idi napukawan daytoy iti preno.
Nagdirdiretso ti lugan agingga a natumba daytoy.
Naitaray ti lima a pasahero iti Paracelis Community District Hospital, dua iti Tabuk Hospital ken ti dadduma ket iti Natonin Infirmary Clinic.
Dagus met a nakaruar dagiti naiturong iti nasao a klinika kalpasan a naagasan ti linak-am dagitoy a dunor.
