BAGUIO CITY – Imimbestigaran ita ti Ifugao Police Provincial Internal Affairs Service ti dua a kameng ti Alfonso Lista Police Station a nangpaltog iti maysa a nabartek a baro.
Segun kenni SPO1 Alvaro Sicligen, chief investigator ti Alfonso Lista Police Station, addan dagiti kameng ti Ifugao Police Provincial Office a nagturong iti opisina dagitoy tapnu imbestigaranda da PO1 Michael Dumilong ken PO1 Murphy Ivasco.
Immunan nga naikkatan iti armas dagiti dua a pulis bayat ti panakaipasidongda iti imbestigasyon.
Maipalagip a nakaawat iti report manipud kadagiti maseknan nga umili ti Alfonso Lista Police Station nga adda ti nabartek a lalaki a nakasakay iti motorsiklo a pasubli-subli ken agpukkapukkaw.
Dagus a nagresponde dagiti nasao a pulis ngem idi nakagtengda iti lugar ket maatap a limmaban ti biktima a ni Orly Zalazar, 22 anyos ken residente ti Santa Maria, Alfonso Lista, Ifugao.
Gapu iti daytoy ket pinaltogan da PO1 Dumilong ken PO1 Ivasco ti biktima a nagresulta iti ipupusay daytoy.
