BAGUIO CITY – Umap-apela ni Bakun Mayor Fausto Labinio kadagiti agtartarigagay nga agturong sadiay Bakun a saanda pay nga ituloy ti agbiahe gaputa nakarikep dagiti kalsada sadiay.
Segun iti mayor, adda iti close-open situation ti Sinipsip-Ampusongan-Poblacion Road gapu iti panagregaay ti daga.
Kinunana nga uray nu mawaknitan ti nasao a kalsada ket adda manen dagiti margaay a daga manipud iti ngatoen ti bantay.
Kinunana pay a nakarikep met laeng ti Sinacbat Road gapu iti panagregaay ti daga.
Inlawlawag met ti mayor nagpatpatnag ti panagdalus nga impatungpal dagiti maseknan sadiay nga marigatan dagitoy gapu iti sasaaden ti panawen ken iti agtultuloy a panagregaay ti daga isut gapuna a temporaryo nga impasardengda ti patrabaho.
Kabayatanna, dinakamatna a nagbakwit metten ti tallo a pamilya sadiay Brgy. Gambang ken maysa a pamilya sadiay Brgy. Poblacion gapu pay laeng iti pangta ti panagregaay ti daga iti nagdappatan ti balay dagitoy.
